"ကံမေးပွဲ"
သေခါနီးမှာ ကံတရားက မေးခွန်းလေးခု မေးလေ့ရှိပါတယ်။ ကံတရားမေးတဲ့ မေးခွန်းတွေထဲမှာ - - ဆယ်တန်းအောင်ခဲ့သလား၊ အကြီးတန်းအောင်ခဲ့သလား၊ ဓမ္မာစရိယအောင်ခဲ့သလား၊ ဘာဘွဲ့တွေရခဲ့သလဲ ဆိုတာမျိုးတွေ မပါပါဘူး။- တိုက်ဘယ်နှစ်လုံးရှိသလဲ၊ ကားဘယ်နှစ်စီးရှိသလဲ၊ ဘယ်ကျောင်းတိုက်တွေကို ထူထောင်ခဲ့သလဲ ဆိုတာမျိုးတွေ မပါပါဘူး။ - လူပျိုကြီးလား၊ အပျိုကြီးလား၊ အိမ်ထောင်ရှိခဲ့လား၊ ဘုန်းကြီးလား၊ သီလရှင်လား၊ ဗုဒ္ဓဘာသာဝင်လား၊ ခရစ်ယာန်ဘာသာဝင်လား၊ မွတ်စလင်ဘာသာဝင်လား၊ ဟိန္ဒူဘာသာဝင်လား၊ ဘာသာမဲ့လား၊ ဆိုတာမျိုးတွေ မပါပါဘူး။
- သမ္မတဖြစ်ခဲ့သလား၊ ဝန်ကြီးဖြစ်ခဲ့သလား၊ အမတ်လား၊ အရာရှိလား၊ ကုမ္ပဏီပိုင်ရှင်လား၊ မန်နေဂျာလား၊ ရိုးရိုးဝန်ထမ်းလား၊ ကျောင်းထိုင်ဘုန်းကြီးလား၊ တိုက်အုပ်လား၊ စာချလား ဆိုတာမျိုးတွေ မပါပါဘူး။ ......................... သေခါနီးမှာ ကံတရားကမေးတဲ့ မေးခွန်းတွေကတော့၊ နံပါတ်စဉ်အလိုက်ဆိုပါရင် ...
၁။ အမေကိုသတ်ခဲ့သလား၊ အဖေကိုသတ်ခဲ့သလား၊ ရဟန္တာကိုသတ်ခဲ့သလား၊ ဘုရားကို သွေးစိမ်းတည်အောင်လုပ်ခဲ့သလား၊ သံဃာကို သင်းခွဲခဲ့သလား။ စျာန်ရခဲ့သလား။
၂။ ဒီမတိုင်ခင်လေးမှာ သူများပျက်စီးရာပျက်စီးကြောင်းကြံခဲ့သလား၊ ပြောခဲ့သလား၊ လုပ်ခဲ့သလား၊ သူများအကျိုးရှိရာရှိကြောင်းကြံခဲ့သလား၊ ပြောခဲ့သလား၊ လုပ်ခဲ့သလား။
၃။ သူများအပေါ် မလိုမုန်းထားတဲ့စိတ်တွေ ထားလေ့ရှိခဲ့သလား၊ သူများအသက်ကို သတ်ဖြတ်ပြီး အသက်မွေးလေ့ရှိခဲ့သလား၊ သူများဥစ္စာကို မတရားရယူပြီး အသက်မွေးလေ့ရှိခဲ့သလား၊ သူများကို လိမ်ညာလှည့်ပတ်ပြီး အသက်မွေးလေ့ရှိခဲ့သလား၊ သူများအကျိုးစီးပွားပျက်စီးအောင် ဂုန်းချောလေ့ရှိခဲ့သလား၊ တဖက်သားနာကျင်ခံခက်အောင် ဆဲဆိုကြိမ်းမောင်းလေ့ရှိခဲ့သလား၊ တဖက်သားကို ညှင်းဆဲနှိပ်စက်လေ့ရှိခဲ့သလား။ တရားသဖြင့် အသက်မွေးလေ့ရှိခဲ့သလား၊ အလှူဒါနလုပ်လေ့ရှိခဲ့သလား၊ သီတင်းသီလဆောက်တည်လေ့ရှိခဲ့သလား၊ စိတ်ကိုတည်ငြိမ်အေးချမ်းအောင် ထားလေ့ရှိခဲ့သလား၊ ဖောက်ပြန်ပျက်စီးတတ်တဲ့ သဘာဝတရားတွေကို သိမြင်အောင် ကြိုးစားလေ့ရှိခဲ့သလား။
၄။ အမှတ်တမဲ့လုပ်ခဲ့ဖူးတဲ့ မကောင်းတာ၊ ကောင်းတာ ဘာတွေရှိခဲ့သလဲ။ စတဲ့ မေးခွန်းတွေကိုပဲ မေးပါတယ်။
........................................
အဲဒီမေးခွန်းလေးခုမှာ - - ပထမမေးခွန်းက အားကြီးတဲ့ ဂရုကံရှိ/မရှိမေးတာပါ။ ရှိခဲ့ရင်၊ နောက်မေးခွန်း ဆက်မမေးတော့ပါဘူး။
- ဒုတိယမေးခွန်းက သေခါနီးမှာ ကပ်ပြီးသတိရတဲ့ကံ၊ ကပ်ပြီးလုပ်ခဲ့တဲ့ အာသန္နကံ ရှိ/ မရှိ မေးတာပါ။ ရှိခဲ့ရင်၊ နောက်မေးခွန်း ဆက်မမေးတော့ပါဘူး။
- တတိယမေးခွန်းက ဒီဘဝမှာ လုပ်လေ့လုပ်ထရှိတဲ့ အာစိဏ္ဏကံ ရှိ/ မရှိ မေးတာပါ။ ရှိခဲ့ရင် နောက်မေးခွန်း ဆက်မမေးတော့ပါဘူး။
- စတုတ္ထမေးခွန်းကတော့ အတိတ်ဘဝတွေကလုပ်ခဲ့တာတွေထဲကရော၊ ဒီဘဝမှာ (အထက်ကမေးခွန်းသုံးခဲ့ထဲမှာ အကျုံးမဝင်ခဲ့တဲ့) လုပ်ခဲ့ဖူးတာတွေထဲကရော အမှတ်မထင် လုပ်ခဲ့ဖူးတဲ့ ကဋတ္တာကံ ရှိ/မရှိ သူ့ဘာသာတူးဆွပြီး မေးတာပါ။ များသောအားဖြင့် အထက်မေးခွန်း သုံးခုမှာတင် ကိစ္စပြတ်သွားလေ့ရှိပါတယ်။
........................
ဒီမေးခွန်းတွေကို ဘယ်သူကမေးတာလဲဆိုရင် ကံတရားကပဲ မေးတာပါ။ ကံတရားကမေးလာပြီဆိုတဲ့အခါ လိမ်လို့လည်းမရ၊ ညာလို့လည်းမရ၊ ခိုးဖြေလို့လည်းမရ၊ သူများကူဖြေပေးလို့လည်းမရပါဘူး၊ ကိုယ်တိုင်ပဲဖြေကြရပါတယ်။
ရှင်းရှင်းပြောရရင် ကံတရားသည်ပင် မေးခွန်းထုတ်ပြီး ကံတရားကိုယ်တိုင်ပဲဖြေပါတယ်။ ကံတရားကိုယ်တိုင်ပဲ အမှတ် အနည်းအများ သတ်မှတ်ပါတယ်။ ကံတရားကိုယ်တိုင်ကပဲ ဆိုင်ရာဆိုင်ရာ ဆုပေးဒဏ်ပေးလုပ်ပါတယ်။ ဘယ်သူမှ ဝင်စွက်လို့မရပါဘူး။
ဒါကြောင့်မို့ ကိုယ့်ကိုယ်ကိုရော စာဖတ်သူမိတ်ဆွေများကိုပါ သေချာပေါက် ဖြေဆိုကြရဦးမယ့် ကံမေးပွဲတစ်ခု ရှိသေးကြောင်း အောက်ပါကဗျာကလေးနဲ့ သတိပေးနှိုးဆော်လိုက်ရပါတယ်။ "ကံမေးပွဲ" သေခါနီး ကံကြီးရယ်တဲ့ မေးတဲ့ခါ၊ ဘယ်ဟာက ငါပိုင်တာ ဘယ်ဟာက ငါ့ရာထူး ဘယ်ဘာသာ ငါနေခဲ့တယ် ဖြေမရဘူး။
ရည်စူးတဲ့ စိတ်စေတနာ ဆိုပြောတာ ဘယ်ပုံပန်း လုပ်ကိုင်ပုံ ဘယ်စခန်းရယ်လို့ မညာတမ်း ဖြေနွှဲရတယ် ကံမေးပွဲထူး။ အထူးပန်ခြွေ ဖြူပါလေ စိတ်ထား၊ အကုသိုလ်ရှောင်ကာရှားလို့ ကောင်းမှုဆောင် အောင်ကြရမယ် အောင်ဓာတ်ထုံကူး။
(အဘိဓမ္မတ္ထသင်္ဂဟ၊ ပါကဒါနပရိယာယစတုက္ကကို မှီးပါသည်။)
မေတ္တာဖြင့် အရှင်ဝိသာရဒ (ရမ္မာဝတီ) 21/ 03/ 2018
